Kramfoj

estas muskolaj spasmoj, nevolaj, doloraj kaj nedaŭraj, kiuj povas trafi unu muskolon (aŭ parton ĝian) aŭ plurajn muskolojn. llia plej komuna kaŭzo estas la intensaj fizikaj ekzercoj, ekzemple dum sporto, kiuj postulas grandan muskolan streĉiĝon. Perforta aŭ subita movo kaj nekutima pozicio de membro povas okazigi kramfojn. Dumnoktaj kramfoj de la piedoj aŭ kruroj, kiuj subite komenciĝas, estas tre komunaj. Menciindas la kramfoj atribueblaj al la varmo, kiuj trafas la membrojn kaj la abdomenan parieton de homoj laborantaj en varmega medio, multe ŝvitas kaj trinkas abundan akvon. lli ŝuldiĝas al la perdo de natrio, kaj oni povas ilin preventi aŭ mildigi trinkante akvon iom salitan. Pro la sama kaŭzo povas prezentiĝi ankaŭ kramfoj, kiam la korpo perdas multan akvon pro malsano (lakso, vomado ktp.). La kuracado konsistas en permana masaĝo de la afekciita muskolo, kiam okazas la atako. Krome estas konsilinde fari moderajn fizikajn ekzercojn kaj observi vegetaran dieton, prefere nekuiritan.